زمااااااااااااان لما كنا صغيرين كنا بنقعد أنا وأخويا و بابا على السرير وبابا يحكلنا حكاية قبل النوم.لكن حكايتة كانت مختلفه عن الحكايات اللى بيحكوها الأباء لأطفالهم فلم تكن القصة مكتوبة في كتاب .
حكايه بابا اسمها القطة الكبيره والقطة الصغيرة. والمقصود بالقطة الكبيره والقطة الصغيرة هما أنا وأخويا ومحتوى القصة هى أفعالنا اليومية. كان بيحكلنا الحاجات اللى عملناها طول اليوم سواء حاجات حلوة أو حاجات وحشة .وبقينا أحنا فى نهاية كل يوم بنقعد أنا وأخويا وبابا على السرير ونطلب منة يحكلنا حكاية القطة الكبيره والقطة الصغيرة.
أعتقد انها كانت طريقة جميلة جدا للتأديب علشان يعلمنا من غير ما يقعد يوعظنا فكان بيشجعنا لما نعمل حاجه كويسة ويلفت نظرنا لما نعمل حاجة غلط.
كان يقول مثلا القطة الكبيره مازكرتش النهاردة كويس ونامت طول اليوم و القطة الصغيرة زاكرت كويس بس ضايقت القطة الكبيره واتخانقت واتشاكلت معاها.
الللللللللة كانت أيام جميلة كنا دايما بنضحك لما بابا بيحكلنا الحكاية واحنا أياميها كنا عارفين انة يقصدنا بالحكاية...... كانت أيام جميلة.الأيام اللي كنا فيها صغيرين .
أنا فاكرة مره بابا قال نكتة ماكنتش تضحك أوى بس أنا أعدت أضحك عليها و من كتر ماضحكت اتخبطت راسى في الحيطة. كنا بنضحك كتير أوى.
أنا فاكرة كمان ان أنا وأخويا كنا بنام علي ظهرنا ونبص للسقف ونقعد نقول كان واحد اسمه لمبه كان واحد اسمه نجفة كان واحد اسمه كرسى ونتسابق في ذكر أسماء لايمكن للناس انها تتسما بيها. وبعد منقول الأسامى ديه نقعد نضحك جدا علي الأسامي اللي بنقولها ونفضل علي الحاله ديه مدة ليست بقليله لحد ما نتعب من الضحك أو لما نزهق فنقوم نعمل حاجة تانية.
كان عندنا لعبة مسليه أوي وهى اسمها توته وكانت من أحب اللعب الي قلبنا.العبه ديه كل الأطفال تقريبا بيلعبوها وهما صغيرين. لعبة بابا وماما.كنا بنعمل خيمه بالكوفرته ونسبتها في كراسى ونلم كل الأعاب اللى بنحبها ونلعب تحت الكوفرته قصدي الخيمة.والعروستان بتوعي كيكي وبوسي هما الأطفال والأب اسمة فتحي معرفش جبنا الاسم دة منين.وكنا بنقدى وقت جميل أوي تحت الخيمه ديه وساعات كمان نتغدى تحت.
لما عمتنا زارتنا واحنا صغيرين كنا بننقل السجاده ونحطها في البلكونه وتكون الشمس منورة نقعد نلعب كوتشينة وكانت ساعات بتحكلنا من طرائف جحا كانت أيام جميله واحنا صغيرين.
لمل كبرت شوية كان معظم وقتى بقضية في قراءة كتب القراءة للجميع. مان بابا مواظب على شراء كل يوم كتاب أو أتنين وكنت دايما بخلصهم.
لما بزهق من القراءة كنت برسم. بحب أنقل أشكال كاريكاتورية وبعدها أقوم بتلوينها.
وكل ده لما كنا صغيرين في حاجات كبرت معايا وفضلت لسة بعملها زي القراءه مثلا والرسم لما تشدنى صورة من غير ما أفكر بقوم رسماها حتي لو في وسط محاضرة في الجامعة مثلا.
كنت بعملها كتير وياما رسمت أيام المحاضرات.
دلوقتي في حاجة جدت عليا وهي الكتابة. أنا لما كنت صغيرة كنت بحب أكتب برضة مذكراتي بس أكيد طبعا كانت حاجات على أد سنى ساعتها لما بقرأها دلوقتى بفطس على روحى من الضحك.
دلوقتي بكتب حاجات أكبر شويه وأكيد لما أكبر كمان تانى هاضحك عليها. بس هى حاجة فعلا مسليه ان الواحد يكتب اللى جواة واللي حاسس بيه والمذكرات بتاعته .
