وأنا صغيره كنت ساعات بروح مع بابا السوق مش دايما يعنى...... لما ببقى زهقانه كنت بنزل معاه .ده لما كنت صغيره.
النهارده السبت 11/3/2006 لما كبرت و بقيت بشتغل حبيت أروح مع بابا السوق....لقيت الجو جميل و الشمس طالعه قلت أنزل معاه و أتمشى وخصوصا انى بحب أنزل أوى مع بابا لأنه دائما بيقعد يهزر ويفاصل مع البياعين وبحس انه فى ألفه بينه و بين الناس.
نزلنا السوق وكان الجو جميل زي ما قلت في البدايه...واحنا ماشيين بابا شاف فراوله شكلها حلو كدة فسأل الست بتاعه الفراوله :بكام الفراوله ديه؟ 1,50 ؟
فردت الست وهى مبتسمه : ب2,00 يابيه.وأعدت تغني للفراوله وهى مبتسمه كأنها بتغنى لحبيبها . الست ديه لو شفتها وهى قاعدة كدة علي الأرض وفرشه الفرشه بتاعتها وقاعدة مبتسمه كده تقول انها قاعدة في بيتها كده ومريحه......عجبتنى أوي ابتسامه الست ديه وقلت في نفسى الست دية أكيد راضية بحالها لأن الأبتسامه بتاعتها ايتسامه تريح الزبون وتخليه يشتري منها علشان ابتسامتها و روحها الجميله.
بعد ما اشترينا الفراوله بابا قال لها خللي الفراوله عندك ونبقى نيجى ناخذها بعد ما نلف في السوق.ومشينا من عند الست وأعدنا نتفرج علي الخضار و الفاكهه اللي فى السوق.
بصراحه أنا كنت ماشيه خايفه لهدومى تتوسخ علشان الشارع ضيق ومتوسخ والناس يعنى مش مهتمين بمنظرهم الخارجى أوى ..... ناس بسيطه وكمان كنت ماشيه بحذر علشان بخاف من الكلاب والشارع ضيق يعنى مش هاينفع أجري أو أعمل أي حركه متهوره.
المهم رحنا عند بياع الخص واحنا واقفين عنده سألته بنت عن تمن الخص قال لها 2 ب1,00 حاولت تفاصل و تاخد 4 ب 1,00 فشلت في الفصال فمشيت.أما انا و بابا فاشترينا 2 ب 1,00 وسبناها برضه عند الراجل زى ماعملنا مع الست بتاعه الفراوله.
كملنا مشى لحد الراجل بياع التوم. الراجل ده شكله برضه طيب أوى كل شويه يقول لبابا كل سنه وأنت طيب يابيه وبعد ما اشترينا التوم سبناه برضه عند الراجل زى ماعملنا مع الراجل بتاع الالخص و الست بتاعه الفراوله.اخر حاجه رحنا اشتريناها كان اليوستفندى .
في طريق العوده لأخذ الحاجات اللى ركناها عند البياعيين شفت الفرارجى بيوزن لستات الفراخ استغربت جدا لأن اليومين دول بالذات محدش بيأكل فراخ علشان أنفلونزا الطيورالمهم كنت ماشيه وأنا خايفه لفرخه تلمسني أو تفلت من أيدين البياع......لكن الحم لله جالي مكالمه علي المحلول يوه قصدي المحمول ورديت عليها كانت صاحبتى أبتا و يظهر ان ربنا لهانى علشان مفكرش في الفراخ .أعدت أتكلم و بابا أخد التوم و الخص ولما وصلنا عند الست بتاعه الفراوله كنت خلصت المكالمه. اخلر حاجه اشتريناها كان الخرشوف...الله علي الخرشوف وهو مقلي بحبه جدا.
وده كان يومى مع بابا فى السوق لما كبرت.
